கற்றல் இடைவெளியைக் குறைக்க ‘இல்லம் தேடிக் கல்வித் திட்டம்’: அமைச்சா் தொடக்கி வைத்தாா்

கரோனா பெருந்தொற்றால் 1 முதல் 8-ஆம் வகுப்பு வரை பயிலும் மாணவா்களிடையே ஏற்பட்டுள்ள கற்றல் இடைவெளியைக் குறைக்கும் வகையில் ‘இல்லம் தேடிக் கல்வி’ என்ற புதிய திட்டத்தை பள்ளிக் கல்வித்துறை அமைச்சா் அன்பில் மகேஷ் பொய்யாமொழி திங்கள்கிழமை தொடக்கி வைத்தாா்.

இது தொடா்பாக சென்னை டிபிஐ வளாகத்தில் நடைபெற்ற விழாவில் அமைச்சா் அன்பில் மகேஷ் பொய்யாமொழி, திட்டம் தொடா்பான கையேட்டை வெளியிட்டுப் பேசியது: இந்தத் திட்டம் மாநில அரசின் 100 சதவீத பங்களிப்பின் கீழ் ரூ.200 கோடி மதிப்பீட்டில் தமிழகம் முழுவதும் செயல்படுத்தப்படவுள்ளது. திட்டத்தின்படி மாணவா்களின் வசிப்பிடம் அருகில் சிறிய குழுக்கள் மூலம் தன்னாா்வலா்களின் பங்கேற்புடன் மாலை 5 மணி முதல் இரவு 7 மணி வரை வகுப்புகள் நடைபெறும். நிகழ் கல்வியாண்டில் ஆறு மாத காலத்துக்கு மாணவா்களை அன்றாட கற்றல் செயல்பாடுகளில் எளிய முறையில் படிப்படியாக பங்கேற்கச் செய்யத் திட்டமிடப்பட்டுள்ளது. இதன் மூலம் மாணவா்கள் வரும் கல்வியாண்டில் அடுத்த வகுப்புக்குச் செல்லும்போது அவா்கள் அதற்கு முழுத் தகுதி படைத்தவா்களாக இருப்பாா்கள்.

இது ஓா் அரசுத் திட்டமாக மட்டுமில்லாமல் பெற்றோா்கள், பொதுமக்கள், தன்னாா்வலா்கள், ஆசிரியா்கள், பல்வேறு துறைகளைச் சோ்ந்த பிரபலங்கள் என அனைவரும் இணைந்து முன்னெடுத்துச் செல்லும் திட்டமாக உருவாக்கப்பட்டுள்ளது. இந்தத் திட்டம் கடலூா், திண்டுக்கல், ஈரோடு, காஞ்சிபுரம், கன்னியாகுமரி, கிருஷ்ணகிரி, மதுரை, நாகப்பட்டினம், நீலகிரி, தஞ்சாவூா், திருச்சி, விழுப்புரம் ஆகிய 12 மாவட்டங்களில் இரு வார காலத்துக்கு முன்னோட்ட அடிப்படையில் செயல்படுத்தப்பட்டு அதன் மூலமாக கிடைக்கப் பெறும் கற்றல் விளைவுகளை அடிப்படையாகக் கொண்டு அனைத்து மாவட்டங்களுக்கும் விரிவுபடுத்தப்படும்.

இல்லம் தேடிக் கல்வித் திட்டத்தை அனைவருக்கும் கொண்டு செல்ல கலைக்குழுவினா் உதவியுடன் சைக்கிள் பேரணி, வீதி நாடகம், பொம்மலாட்டம், கதை சொல்லுதல் என பல்வேறு விழிப்புணா்வு நிகழ்ச்சிகள் நடத்தப்படும். கரோனா பெருந்தொற்று காரணமாக பள்ளிகள் மூடியிருந்ததால் அரசுப் பள்ளி மாணவா்களின் கல்வித் திறனில் எந்தவொரு குறைபாடும் ஏற்பட்டு விடக்கூடாது என்ற நோக்கத்துடன் இந்தத் திட்டம் செயல்படுத்தப்படுகிறது என்றாா் அவா்.

இதில் பள்ளிக் கல்வி முதன்மைச் செயலா் காகா்லா உஷா, ஆணையா் நந்தகுமாா், ஒருங்கிணைந்த பள்ளிக் கல்வி மாநிலத் திட்ட இயக்குநா் இரா.சுதன், கூடுதல் மாநில திட்ட இயக்குநா் வி.சி.ராமேஸ்வரமுருகன், தொடக்கக் கல்வி இயக்குநா் க.அறிவொளி உள்ளிட்டோா் கலந்து கொண்டனா்.