4% அகவிலைப்படி உயர்வை ஜனவரி 1ம் தேதியிலிருந்து வழங்க வலியுறுத்தல்

4% அகவிலைப்படி உயர்வை ஜனவரி 1ம் தேதியிலிருந்து வழங்க வேண்டும்: ஓபிஎஸ் வலியுறுத்தல்

முன்னாள் முதல்வர் ஓ.பன்னீர்செல்வம் வெளியிட்ட அறிக்கை: 2023 ஜனவரி 1ம் தேதி முதல் ஒன்றிய அரசு ஊழியர்கள் மற்றும் ஓய்வூதியதாரர்களுக்கு அடிப்படை ஊதியத்தில் 4 சதவீத அகவிலைப்படி உயர்வை ஒன்றிய அரசு அண்மையில் அறிவித்தது.

இதன் அடிப்படையில் தமிழ்நாடு அரசு ஊழியர்கள் மற்றும் ஓய்வூதியதாரர்களுக்கு 4 விழுக்காடு அகவிலைப்படி உயர்வை ஜனவரி 1ம் தேதி முதல் வழங்க வேண்டும். ஆனால், இந்த 4 சதவீத அகவிலைப்படி உயர்வு ஏப்ரல் 1 முதல் வழங்கப்படும் என்று தமிழ்நாடு அரசு அறிவித்துள்ளது.

அரசு ஊழியர்கள், ஆசிரியர்கள் மற்றும் ஓய்வூதியதாரர்களுக்கான அகவிலைப்படி உயர்வு என்பது உரிமையே தவிர கருணை அல்ல. எனவே தற்போது அறிவித்துள்ள 4 சதவீத அகவிலைப்படி உயர்வை கடந்த ஜன.1ம் தேதி முதல் உடனடியாக வழங்க வேண்டும், அகவிலைப்படி உயர்வு ஆணையில் ஒன்றிய அரசின் அகவிலைப்படி உயர்வு ஆணை மேற்கோள் காட்டப்பட வேண்டும் என்று அதிமுக சார்பில் வலியுறுத்திக் கேட்டுக் கொள்கிறேன். இவ்வாறு அவர் கூறியுள்ளார்.