ஒக்கியம் துரைப்பாக்கம் அரசு பள்ளி - முதல்வர் கோப்பை கால்பந்தில் முதலிடம்

ஒக்கியம் துரைப்பாக்கம் அரசு பள்ளி - முதல்வர் கோப்பை கால்பந்தில் முதலிடம் Okkyam Durai Pakkam Govt School - Topped in Principal's Cup Football

சென்னை: மாவட்ட அளவில், பள்ளிகளுக்கு இடையிலான முதல்வர் கோப்பை கால்பந்து போட்டியில், மாணவியரில் ஒக்கியம் துரைப்பாக்கம் அரசு பள்ளி அணி வெற்றி பெற்று, முதலிடம் பிடித்தது.

செங்கல்பட்டு மாவட்ட நிர்வாகம் சார்பில், முதல்வர் கோப்பைக்கான மாவட்ட அளவிலான பல்வேறு விளையாட்டு போட்டிகள் நடைபெற்று வருகின்றன.

பள்ளி, கல்லுாரிகளுக்கு இடையிலான கால்பந்து போட்டி, செங்கல்பட்டு மாவட்டம், காட்டாங்கொளத்துாரில் உள்ள எஸ்.ஆர்.எம்., பல்கலை வளாகத்தில் நடந்தது.

பள்ளி மாணவர்களுக்கான போட்டியில், அரசு பள்ளிகள் உட்பட மொத்தம், 20 அணிகளும், மாணவியரில் நான்கு அணிகளும் பங்கேற்றன.

மாணவியருக்கான போட்டியில், ஒக்கியம் துரைப்பாக்கம் அரசு பள்ளி முதலிடத்தையும், செங்கை எஸ்.டி.ஏ., பள்ளி இரண்டாமிடத்தையும், தாம்பரம் கிரிஸ்ட் கிங் பள்ளி மூன்றாம் இடத்தையும் வென்றன.

மாணவரில் ஜேப்பியார் பள்ளி முதலிடத்தையும், எஸ்.ஆர்.கே.எம்.வி., பள்ளி இரண்டாமிடத்தையும், சோத்துப்பாக்கம் அரசு பள்ளி மூன்றாம் இடத்தையும் வென்றன. கல்லுாரிகளுக்கான போட்டியில், மாணவரில் ஒன்பது அணிகளும், மாணவியரில் எட்டு அணிகளும் மோதின.

அதில், மாணவியருக்கான அனைத்து போட்டிகள் முடிவில், வேல்ஸ் பல்கலை அணி முதலிடத்தையும், குரோம்பேட்டை எஸ்.டி.என்.பி., கல்லுாரி இரண்டாமிடத்தையும், மலைக்கோட்டையூர் தமிழக உடற்கல்வி கல்லுாரி மூன்றாம் இடத்தையும் வென்றன.

ஆண்களில் எஸ்.ஆர்.எம்., கல்லுாரி முதலிடத்தையும், இந்துஸ்தான் கல்லுாரி இரண்டாமிடமும், செயின்ட் ஜோசப் கல்லுாரி மூன்றாமிடமும் பிடித்தன