இன்ஜினியரிங் 'அட்மிஷன்' செல்லுமா? வன்னியர் மாணவர்கள் கவலை!

10.5 சதவீத உள் இட ஒதுக்கீடு

வன்னியர்களுக்கான, 10.5 சதவீத உள் இட ஒதுக்கீடு ரத்தாகி விட்ட நிலையில், இன்ஜினியரிங் மற்றும் கலை கல்லுாரிகளில், இந்த ஒதுக்கீட்டில்சேர்ந்த மாணவர்கள் கவலை அடைந்துள்ளனர்.

தி.மு.க., ஆட்சி

தமிழகத்தில், 69 சதவீத இட ஒதுக்கீட்டில், மிகவும் பிற்படுத்தப்பட்டோருக்கு, 20 சதவீதம் இட ஒதுக்கீடு வழங்கப்படுகிறது. அதில், 10.5 சதவீத இடங்களை, வன்னியர்களுக்கு உள் ஒதுக்கீடாக வழங்க, சட்டசபையில், அ.தி.மு.க., ஆட்சியின் போது சட்டம் இயற்றப்பட்டது.இந்த சட்டத்தை நடைமுறைப்படுத்த, தி.மு.க., ஆட்சிக்கு வந்ததும், அரசாணை வெளியிடப்பட்டது.

அரசாணையை எதிர்த்து, சென்னை உயர் நீதிமன்ற மதுரை கிளையில் தொடரப்பட்ட வழக்கில், வன்னியர்களுக்கான உள் ஒதுக்கீடு ரத்து செய்யப்பட்டது. இந்த உத்தரவை, உச்ச நீதிமன்றமும் உறுதி செய்துள்ளது.இந்நிலையில், தமிழகத்தில் மருத்துவம், சட்டம் உள்ளிட்ட உயர் கல்வி நிறுவனங்களில், வன்னியர்களுக்கு தனி ஒதுக்கீடு இன்றி, வழக்கமான 69 சதவீத ஒதுக்கீட்டில், மாணவர் சேர்க்கை நடத்தப்பட்டுள்ளது. வன்னியர் உள் ஒதுக்கீடு

ஆனால், அண்ணா பல்கலை இணைப்பில் உள்ள, 450 இன்ஜினியரிங் கல்லுாரிகளில், தமிழக உயர் கல்வி துறை சார்பில் நடந்த கவுன்சிலிங்கில், இந்த ஆண்டு வன்னியர் உள் ஒதுக்கீடு அடிப்படையில், மாணவர்களுக்கு இடங்கள் ஒதுக்கப்பட்டுள்ளன. அதேபோன்று, அரசின் கலை மற்றும் அறிவியல் கல்லுாரிகளிலும், வன்னியர் உள் ஒதுக்கீடு அடிப்படையில் மாணவர்கள் சேர்க்கப்பட்டுள்ளனர்.

தமிழக அரசு உரிய முடிவு

இன்ஜினியரிங் மற்றும் அரசு கலை அறிவியல் கல்லுாரிகளில் மட்டும் வன்னியர் ஒதுக்கீடு வழங்கப்பட்டதால், இந்த மாணவர் சேர்க்கை செல்லுமா என்ற கேள்வி எழுந்துள்ளது. இதனால், சம்பந்தப்பட்ட மாணவர்களும், அவர்களின் பெற்றோரும் கவலை அடைந்துள்ளனர். எனவே, வன்னியர் ஒதுக்கீட்டில் சேர்க்கப்பட்ட மாணவர்களின் நிலை குறித்து, தமிழக அரசு உரிய முடிவை அறிவிக்க வேண்டிய கட்டாயம் எழுந்துள்ளது.